Ingi Tómasson

Hafnarfjörður


Leave a comment

Mikilvægi álversins í Straumsvík

Morgunblaðið 6. júní 2020

Rio Tinto Alcan

Í rúm 50 ár hefur álverið í Straumsvík verið afar mikilvægt okkur Hafnfirðingum, atvinnulega og tekjulega fyrir fjölskyldur, fyrirtæki og Hafnarfjarðarbæ, á sama hátt hefur þjóðarbúið hagnast verulega af rafmagnssölu til álversins og útflutningsverðmæti úr Straumsvík á þessu tímabili eru gríðarleg. 

Deilt um raforkuverð

Samkeppnisstaða álvera hefur verið í umræðunni, lágt álverð og hátt raforkuverð eru helst nefnd sem aðalástæða slæmri stöðu áliðnaðarins á Íslandi. Án þess að taka afstöðu til hvort raforkuverð til stóriðju sé sanngjarnt eða ósanngjarnt má nefna að 85% raforkusölu Landsvirkjunar er til stóriðju, að hagnaður Landsvirkjunar hefur verið gríðarlegur síðustu árin, skuldir hafa lækkað verulega og fyrirtækið áætlar að greiða tugi milljarða í arð til eigenda síns næstu árin. Í þessu samhengi má nefna að forstjóri Landsvirkjunar lýsti því yfir í október 2010 að færi fyrirtækið ekki í neinar framkvæmdir gæti það greitt niður allar skuldir sínar á næstu 10-12 árum. Í umræðunni hafa bæði ráðherra málflokksins og forstjóri Landsvirkjunar líst því yfir að ekki komi til greina að niðurgreiða raforkuna eða setja sameiginlegar orkuauðlindir á útsölu, þessu er ég sammála en spyr hvar liggja hagnaðarmörk Landsvirkjunar og hvað er að frétta af kortlagningu á samkeppnisstöðu stóriðju með áherslu á orkuverð sem ferðamála-, iðnaðar- og nýsköpunarráðherra boðaði að skilaði yrði á vormánuðum 2020?

Blikur á lofti

Fréttir um hugsanlega lokun álversins í Straumsvík ber að taka alvarlega. Hjá fyrirtækinu starfa um 500 manns auk fjölda starfa tengda álverinu, ætla má að um helmingur starfsmanna álversins komi frá Hafnarfirði. Viðskipti álversins við fyrirtæki í Hafnarfirði voru um 2 milljarðir á síðasta ári og tekjur bæjarins vegna álversins voru um 500 milljónir, þá eru ekki taldar með útsvarstekjur starfsmanna álversins eða starfsmanna fyrirtækja tengda álverinu. Ekki þarf að fjölyrða um áhrif lokunar álversins á alla þá starfsmenn og fjölskyldur þeirra sem reiða sig á öruggar tekjur frá álverinu, á öll þau fyrirtæki sem selja vörur og þjónustu til álversins og á Hafnarfjarðarbæ sem yrði af verulegum tekjumissi. Ofan á þetta allt saman erum við í „fordæmalausum“ aðstæðum vegna Covid – 19. Ég geri þá kröfu að ráðherrar og Landsvirkjun finni ásættanlega lausn með eigendum ÍSAL, Rio Tinto, annað er ekki í boði.

Ó. Ingi Tómasson

Bæjarfulltrúi (D) Hafnarfirði



Leave a comment

Skipulag og framkvæmdir

Hafnfirðingur 4. mars. 2020

Hamranes, nýjasta byggingarsvæðið í Hafnarfirði kemur í framhaldi af uppbyggingu í Skarðshlíð. Gert er ráð fyrir að á vormánuðum verði búið að úthluta um 600 íbúðum í fjölbýli í Hamranesi og að uppbygging muni hefjast strax á þessu ári. Ásvallabraut sem liggur frá Skarðshlíð að Kaldárselsvegi er komin í útboð og munu framkvæmdir hefjast í vor. Glæsilegur leik- og grunnskóli er risinn í Skarðshlíð og stutt er í náttúruperlu Hafnarfjarðar, upplandið. Frábær valkostur til búsetu fyrir alla.

Uppbygging á öðrum svæðum

Nýverið var samþykkt glæsilegt rammaskipulag fyrir Flensborgarhöfn og Óseyrarsvæði. Svæðið mun byggjast upp sem íbúðar- verslunar- og þjónustusvæði tengist hjarta Hafnarfjarðar, miðbænum okkar. Framundan er áframhaldandi skipulagsvinna sveitarfélagsins og lóðarhafa. Skipulagsvinna við Hraun vestur, fimm mínútna hverfið er í fullum gangi. Hverfið er miðsvæðis með góða tengingu við almenningssamgöngur og mun einnig byggjast upp sem íbúðar- verslunar- og þjónustusvæði. Spennandi verður að sjá þessi svæði byggjast upp.

Reykjanesbrautin

Til að tryggja umferðaröryggi er Það forgangsmál að lokið verði við tvöföldun Reykjanesbrautar sem allra fyrst. Nýlokið er gerð mislægra gatnamóta við Krýsuvíkurveg og unnið er að tvöföldun frá þeim kafla að Kaldárselsvegi, þeim framkvæmdum lýkur á þessu ári. Meirihlutinn í bæjarstjórn Hafnarfjarðar hefur lagt þunga áherslu á að lokið verði við kaflann frá Krýsuvíkurvegi að Hvassahrauni. Það var því ánægjulegt þegar samgönguráðherra lýsti því yfir að flýta mætti framkvæmdum á þessum kafla um fjögur ár og framkvæmdir gætu hafist árið 2022. Forsenda þess er breyting á aðalskipulagi þar sem Reykjanesbrautin yrði breikkuð í núverandi vegstæði. Í gildandi aðalskipulagi er gert ráð fyrir að Reykjanesbrautin taki stóran sveig upp fyrir Straumsvík sem er mun dýrari kostur en að breikka hana í núverandi vegstæði. Bæjarstjórn Hafnarfjarðar hefur samþykkt að fara í þessa aðalskipulagsbreytingu þar sem  Reykjanesbrautin verði áfram í núverandi vegstæði. Sannarlega mörg skemmtileg verkefni framundan í Hafnarfirði.

Ó. Ingi Tómasson, bæjarfulltrúi, formaður skipulags- og byggingarráðs   


Leave a comment

Hafnarfjörður í forystu í aukinni sjálfbærni í skipulags- og byggingarmálum

Vísir 12. júní 2019.

Minnkun á losun gróðurhúsalofttegunda er mál sem ekki fyrir svo löngu síðan komst í hámæli. Við Hafnfirðingar höfum tekið umhverfismálin alvarlega m.a. með metnaðarfullri umhverfis- og auðlindarstefnu þar sem tekið er á flestum málum er varða verndun og betri umgengni við umhverfið auk aðgerðaráætlunar varðandi stefnu Hafnarfjarðar um umhverfis og auðlindarmál.

Vistvænar framkvæmdir í Hafnarfirði

Bæjarstjórn Hafnarfjarðar samþykkti þann 29. maí tillögur að aðgerðum til að hvetja húsbyggjendur að setja umhverfið í forgang í samræmi við Heimsmarkmið Sameinuðu þjóðanna um sjálfbæra þróun, auknar kröfur um minni losun gróðurhúsalofttegunda út í andrúmsloftið og aukna umhverfisvitund almennings. Tillögurnar fjalla m.a. um að djúpgámar verði á öllum uppbyggingarsvæðum auk þess sem gert verði ráð fyrir þeim við endurskoðun á skipulagsskilmálum í eldri hverfum. Samþykkt voru ákvæði um endurvinnslu úrgangs á framkvæmdarstað, að minnsta kosti 20% byggingarefna í nýframkvæmdum skuli hafa umhverfisvottun og að Hafnarfjarðarbær móti sér stefnu um vottun ( Breeam, Svanurinn eða sambærilegt) allra nýbygginga á vegum sveitarfélagsins. Samþykkt var að innleiða hvata til framkvæmdaraðila til þess fá Svansvottun, BREEAM vottun eða sambærilegt á nýbyggingar, meðal annars í formi afsláttar af lóðaverði. Samþykkt var að afsláttur af lóðarverði vegna Svansvottaðs húss verði 20%, að byggingar með Breeam einkunn “Very good” 55% fái 20% afslátt af lóðarverði og við Breeam einkunn “Excellent” 70% verði afsláttur af lóðarverði 30%. Þá samþykkti bæjarstjórn jafnframt að Hafnarfjörður gerist aðili að Grænni byggð.

Í stóra samhenginu

Samþykkt bæjarstjórnar er einkar ánægjuleg en e.t.v. vill lítið skref í stóra samhenginu um umhverfisvernd en lýsir vilja bæjarstjórnar Hafnarfjarðar í umhverfismálum. Í stóra samhenginu þar sem byggingar og byggingariðnaðurinn á heimsvísu er talinn ábyrgur fyrir um 25%-35% losun gróðurhúsalofttegunda má e.t.v. segja að samþykkt okkar í Hafnarfirði megi sín lítils en eins og máltækið segir „margt smátt gerir eitt stórt“ þannig munum við ná árangri í umhverfismálum.

Ó. Ingi Tómasson, bæjarfulltrúi Hafnarfirði (D)


Leave a comment

Að slá ryki í augu fólks

Fjardarfréttir 1. maí 2019.

Vegna greina sem fulltrúar Samfylkingarinnar og Viðreisnar skrifuðu í Fjarðarfréttir þann 17. apríl er rétt að vekja athygli á eftirfarandi.

Miðbæjarskipulagið

Friðþjófur helgi Karlsson, bæjarfulltrúi Samfylkingarinnar, virðist vera utangátta í  stjórnkerfinu þegar hann fullyrðir að verið sé að halda skipulagsvinnu miðbæjarins leyndri. Bæjarfulltrúar Samfylkingarinnar í bæjarstjórn, í skipulags- og byggingarráði og í bæjarráði hafa getað hvenær sem er í ferli skipulags miðbæjarins lagt fram tillögur sama efnis og Friðþjófur sér sig knúinn til að skrifa um. Miðbæjarskipulagið hefur verið til umfjöllunar í skipulags- og byggingarráði síðustu ár. Undirbúningur er mikill og vandasamur. Húsakönnun og aðrir þættir sem snerta m.a. lóðaleigusamninga, gildandi skipulag og réttindi lóðarhafa hafa verið framkvæmdir og skoðaðir og eru innlegg í væntanlegt skipulagsferli. Nýverið skipaði bæjarráð starfshóp um skipulag miðbæjarins. Starfshópinn skipa þrír kjörnir fulltrúar úr meiri- og minnihluta, fulltrúi íbúa í miðbænum, fulltrúi fyrirtækja í miðbænum og fulltrúi Markaðsstofu Hafnarfjarðar. Með skipan starfshópsins er skipulagsvinnan formlega komin af stað og að sjálfsögðu verður sú vinna í opnu ferli í góðu samráði við íbúa Hafnarfjarðar.

Nýbyggingarsvæði

Bæjarfulltrúi og varaáheyrnarfulltrúi  í skipulags- og byggingarráði báðir í Viðreisn fara mikinn í grein sinni . Það er svipað með þá félaga og þann sem skrifaði um miðbæjarskipulagið að ekki ein tillaga um uppbyggingu eða nýtt skipulagssvæði hefur komið frá fulltrúum Viðreisnar á því ári sem sá flokkur hefur átt fulltrúa í bæjarstjórn og skipulags- og byggingarráði. Þau ykkar sem fylgst hafa með skipulagsmálum hér í Hafnarfirði vitið að öll nýbyggingarsvæði liggja undir háspennulínum, að línurnar áttu samkvæmt samkomulagi að fjarlægja á síðasta ári, að framkvæmdaleyfi til Landsnets vegna Lyklafellslínu var kært og fellt úr gildi en Lyklafellslína  er forsenda niðurrifs línanna. Á þessu ári verða línurnar færðar frá nýbyggingarsvæðum í Skarðshlíð og Hamranesi og eru lóðir í Skarðshlíð 3 tilbúnar og Bjarg íbúðarfélag komið langt í sinni skipulagsvinnu í Hamranesinu. Þetta eiga allir bæjarfulltrúar og allt ráðsfólk að vita  Einnig má geta þess að lokið er við gerð rammaskipulags á Hraunum vestur – fimm mínútna hverfið, gert er ráð fyrir um 2.500 íbúðum á svæðinu auk verslun og þjónustu. Lóðarhafar eru þegar byrjaðir á deiliskipulagsvinnu á því svæði. Rammaskipulag hafnarsvæðisins gengur vel og verður kynnt íbúum í byrjun sumars. Unnið er að skipulagi á nokkrum reitum í bænum og má nefna að lokið er vinnu á nokkrum reitum. Það er rétt sem kemur fram í grein þeirra félaga að „skipulagsvinna er tímafrek“. Í því samhengi erum við mjög ánægð með t.d. ganginn í skipulagsvinnu á Hraunum vestur og á hafnarsvæðinu. Við skorum á fulltrúa Viðreisnar að koma með tillögur um svæði til uppbyggingar í Hafnarfirði en ekki bara innantómar fullyrðingar sem ekki standast skoðun og eru einungis til þess fallnar að slá ryki í augu bæjarbúa.

Ó. Ingi Tómasson, formaður skipulags- og byggingarráðs
Ágúst Bjarni Garðarsson, formaður bæjarráðs


Leave a comment

Þétting byggðar – Samgöngur – Lífsgæði

Svæðisskipulag

Fréttablaðið 31.10. 2018

Með samþykkt svæðisskipulags höfuðborgarsvæðisins árið 2015 var mótuð stefna til ársins 2040, ekki bara í skipulagsmálum heldur einnig í samgöngumálum með það að markmiði að stoppa útþenslu byggðar, auka hlutdeild almennings í almenningssamgöngum og bæta lífsgæði okkar allra sem búum á svæðinu svo og þeirra sem sækja okkur heim.

Þétting byggðar

í Hafnarfirði hófst þétting byggðar með uppbyggingu á Norðurbakka, Skipalóni og Lækjargötu. Á þessum stöðum voru frystihús, olíutankar, iðnaður og önnur starfssemi. Nú er nýsamþykkt rammaskipulag fyrir Hraun vestur, nýsamþykkt er deiliskipulag fyrir Dvergsreitin, búið er að samþykkja að hefja vinnu við rammaskipulag Flensborgar- og Óseyrarsvæðis ásamt því að verið er að skoða einstaka reiti fyrir smærri einingar. Samhliða þéttingu þurfa sveitarfélög jafnframt að geta boðið upp á lóðir í útjöðrum byggða

Ávinningur samfélagsins

Uppbygging á þegar skipulögðum og byggðum svæðum er ólík uppbyggingu á nýjum svæðum. Svæðisskipulagið gerir ráð fyrir að mikil uppbygging eigi sér stað næst legu Borgarlínu sem liggur í flestum tilfellum um þegar byggð svæði. Eldri byggingar þurfa í einhverjum tilfellum að víkja og auka þarf byggingarmagn umtalsvert á mörgum stöðum. Ávinningur samfélagsins er umtalsverður í nýtingu innviða s.s. gatna- og lagnakerfis, forsenda skapast fyrir góðar, skilvirkar almenningssamgöngur og sjálfbærni eykst. Við sem ferðumst erlendis sjáum þessi hverfi iðandi af mannlífi með skilvirkum almenningssamgöngum.

Samgöngur

Nýverið var undirrituð viljayfirlýsing um viðræður um uppbyggingu samgangna á höfuðborgarsvæðinu. Markmið þeirra er samkomulag um fjármagnaða áætlun um fjárfestingar í stofnvegum og kerfi almenningssamgangna á höfuðborgarsvæðinu. Stefnt er að sjálfbæru, kolefnishlutlausu borgarsamfélagi og öflugri almenningssamgöngum í takt við loftslagsáætlun stjórnvalda og áherslur sveitarfélaga. Viljayfirlýsingin er í samræmi við svæðisskipulagið um uppbyggingu stofnvega og Borgarlínu. Með þessu er verið að stíga fyrsta skrefið í að bíllaus lífstíll verði raunverulegur valkostur og að stofnvegir beri þá umferð sem þar fer um.

Hagsmunir fárra eða samfélagsins í heild?

Svæðisskipulagið krefst breyttrar hugsunar íbúa sveitarfélaganna svo og stjórnsýslunnar. Mörg álitamál hafa komið upp í skipulagsferli sveitarfélaganna á höfuðborgarsvæðinu. Mál enda í kæru, oftast vegna útsýnisskerðingar eða of þéttrar og/eða hárra byggðar. Við þéttingu byggðar er ekki einungis verið að horfa til fjölgunar íbúða heldur einnig til að þjónusta, verslun og atvinna byggist upp í nærumhverfinu. Vilji sveitarfélaganna á höfuðborgarsvæðinu hvað varðar svæðisskipulagið er mjög skír. Hagsmunir heildarinnar eru í fyrirrúmi. Alþingi þarf að skoða hvort endurskoða þurfi skipulagslög og reglugerðir til einföldunar og skjótari afgreiðslu í kerfinu. Lög um úrskurðarnefnd umhverfis- og auðlindamála og fullgildingu Árósasamningsins þyrfti að endurskoða. Í umsögnum fjölda samtaka úr atvinnulífinu og Sambandi íslenskra sveitarfélaga kom fram gagnrýni á að lögin gengu mun lengra en krafist er í samningnum sjálfum svo og í heimildum til kæru en tíðkast á Norðurlöndum . Allir sem koma að gerð skipulagsmál vilja ná sem bestri sátt hverju sinni en það eru alltaf eru einhverjir sem telja vegið að eigin hagsmunum. Svæðisskipulagið horfir til hagsmuna heildarinnar og það gerum við einnig sem vinnum að skipulagsmálum.


Leave a comment

Lækjargata 2 – Dvergslóðin

Lækjargata 2

Fjarðarpósturinn 27.8. 2018

Það var mikið fagnaðarefni þegar Dvergur var loks rifinn í júlí 2017. Þar með var verið að framfylgja ákvörðun bæjarstjórnar frá hátíðarfundi 1. júní 2008. Í upphafi síðasta kjörtímabils var farið í að vinna nýja skipulagsforsögn fyrir reitinn. Skipulagsforsögnin er forsenda þess deiliskipulags sem samþykkt var í bæjarráði í umboði bæjarstjórnar þann 12. júlí sl. Í skipulagsforsögninni segir m.a. að almennt skuli ekki gera ráð fyrir að byggt verði hærra en 2 hæðir og nýtanlegt ris.

Ferlið

Í byrjun árs 2017 samþykkti skipulags- og byggingarráð (SBH) að efna til forvals um deiliskipulag, hönnun og uppbyggingu á Dvergsreitnum. Á sama fundi lagði ráðið til „að umhverfis- og skipulagsþjónusta undirbúi niðurrif Lækjargötu 2 samkvæmt samþykkt bæjarstjórnar þann 17. febrúar 2016 á deiliskipulagsforsögn Lækjargata 2, Dvergslóðin.“ Forvalsnefnd/matsnefnd var skipuð á fundi SBH þ. 2. maí 2017, fulltrúar ráðsins voru Pétur Óskarsson (BF) og Júlíus Andri Þórðarson (VG). Eftir alútboð var samþykkt einróma að ganga til samninga við GG Verk. SBH samþykkti jafnframt að taka út raðhúsalengju, 4 hús sem voru teiknuð á baklóð Gúttó, gert er ráð fyrir að á þeim reit verði almenningsgarður. Fjölmennur íbúafundur var haldinn í Gúttó um skipulagið. Skipulagið er nú í ferli hjá Skipulagsstofnun.

Uppbygging

Þann 11. júlí sl. undirrituðu þau Rósa Guðbjartsdóttir, bæjarstjóri og Helgi Gunnarsson fyrir hönd GG verks samning um  uppbyggingu á Dvergsreitnum samkvæmt niðurstöðum útboðs. Áætlað er að framkvæmdir hefjist í haust. Það verður ánægjulegt að fylgjast með uppbyggingu á Dvergsreitnum. Gert er ráð fyrir 20 íbúðum, verslun og þjónustu á jarðhæð við Lækjargötu ásamt bílakjallara. Við sem höfum komið að þessu skipulagi erum mjög ánægð með niðurstöðuna. Fyrirhuguð byggð fellur vel að aðliggjandi byggð, mun styrkja mannlífið í miðbænum og er í fullu samræmi við áðurnefnda deiliskipulagsforsögn sem samþykkt var í bæjarstjórn.


Leave a comment

Stóru skipulagsmálin

Fjarðarpósturinn 15.5. 2018

Nýafstaðin er verðlaunaafhending og kynning á hugmyndasamkeppni um Flensborgarhöfn og Óseyrarsvæði. Þátttaka var vonum framar en alls bárust 14 tillögur í samkeppnina. Tvær tillögur deildu með sér 1. og 2. verðlaunum. Báðar þessar tillögur eru vel fram settar þar sem önnur þeirra leysir vel mótun byggðar í kringum Flensborgarhöfnina á meðan hin er með góða sýn á byggð með atvinnustarfsemi í bland við íbúabyggð upp með Óseyrarbraut og vestan við Flensborgarhöfn.

Hraun vestur og miðbærinn.

Annað stórt verkefni er Hraun vestur. Gerð rammaskipulags er lokið, lóðarhafar geta hafið deiliskipulagsvinnu fyrir staka reiti, huga þarf að skóla og leikskólamálum, gatnakerfi og gönguleiðum ásamt öðrum þáttum. Alls er gert ráð fyrir að um 60% byggingarmagns verði íbúðir eða um 2.300, annað verður verslun, þjónusta og léttur iðnaður. Gera má ráð fyrir að framkvæmdir geti hafist snemma á árinu 2019. Við höfum öll skoðun á miðbænum okkar. Með nýjum veitingastöðum og öflugri starfsemi í Bæjarbíói hefur færst aukið líf í miðbæinn. Fráfarandi skipulags- og byggingarráð samþykkti að hefja endurskoðun á deiliskipulagi miðbæjarins og hefur verið ráðin verkefnastjóri til að stýra verkefninu. Gerð verður skipulagslýsing og væntanlega verður efnt til samkeppni um skipulagið. Ný tillaga að deiliskipulagi miðbæjarins gæti legið fyrir á seinni hluta ársins 2019. Mörg önnur áhugaverð skipulagsmál eru í vinnslu eða nýlokið.

Jákvæð uppbygging.

Það sem er nefnt hér að ofan bíður nýrrar bæjarstjórnar, skipulags- og byggingarráðs og hafnarstjórnar. Kjörnir fulltrúar þurfa að setja sig vel inn í þessi stóru mál og sjá til þess að þessum skipulagsmálum sé fylgt vel eftir, að vandað verði til verka og kynnt vel fyrir íbúum og fyrirtækjum. Nái þessar tillögur og hugmyndir allar fram að ganga munum við sjá stórkostlegar og jákvæðar breytingar á fallega og áhugaverða bænum okkar næstu árin og áratugina. Það er eftirsóknarvert að búa í Hafnarfirði og mun verða enn frekar á næstu árum og áratugum.


Leave a comment

Hamraneslínur

Fjarðarpósturinn 6. apríl 2018

ánheitis

Úrskurðanefnd umhverfis- og auðlindamála hefur fellt úr gildi samþykkt bæjarstjórnar Hafnarfjarðarbæjar frá 21. júní 2017 um veitingu framkvæmdaleyfis vegna lagningar Lyklafellslínu 1. Niðurstaða nefndarinnar eru mikil vonbrigði fyrir okkur sem höfum unnið að málinu á kjörtímabilinu og ekki síður fyrir íbúa á Völlum sem í mjög langan tíma hafa ítrekað verið lofað í mjög langan tíma að Hamraneslínurnar verði fjarlægðar.

Ferlið

Árið 2006 var farið að ræða um niðurrif línanna. Við stækkun álversins í Straumsvík 2007 ætlaði álverið að sjá um að setja línur í jörð næst byggð, niðurstaða íbúakosningar um stækkun álversins sló þá hugmynd út af borðinu. Árið 2009 var undirritað samkomulag við Landsnet um lagningu á nýrri línu, Lyklafellslínu (Sandskeiðslínu 1) og niðurrif Hamraneslínu. Ferlið átti að hefjast árið 2011 og enda á þessu ári. Ekkert varð af þessum áformum. Í október 2012 var undirritaður (mjög óljós) viðauki við samkomulagið frá 2009 um að Hamraneslínur yrðu fjarlægðar í síðasta lagi 2020. Í upphafi þessa kjörtímabils var farið í viðræður við Landsnet um niðurrif línanna. Hafnarfjarðarbær átti mjög gott samstarf við íbúasamtök Valla í þessari vinnu sem skilaði niðurstöðu með samkomulagi og var undirritað í júlí 2015. Í samkomulaginu fólst m.a. að ný lína, Lyklafellslína yrði lögð, Hamraneslínur fjarlægðar og Ísallína færð fjær byggð. Ferlinu átti að ljúka á þessu ári. Fyrirvari er í samkomulaginu sem er „force majure“ leyfisveitingar, niðurstaða í kæruferlum eða dómsmálum. Bæjarstjórn Hafnarfjarðarbæjar samþykkti svo framkvæmdaleyfi þann 21. júní 2017, sama hafa Garðabær, Kópavogur og Mosfellsbær gert.

Skipulagið og næstu skref

Í Aðalskipulagi Hafnarfjarðar 2005-2025 og í gildandi Aðalskipulagi 2013-2025 er gert ráð fyrir Lyklafellslínu. Línan er í samræmi við Svæðiskipulag höfuðborgarsvæðisins, sama er um Aðalskipulag sveitarfélaganna þar sem línan liggur um. Hafnfirðingum og þá sér í lagi íbúum á Völlum hefur verið lofað í 9-10 ár að Hamraneslínur yrðu fjarlægðar. Landsnet þarf að svara með hvaða hætti þetta verður gert. Viðræður eru í gangi við Skipulagsstofnum um næstu skref og fljótlega ætti að koma í ljós tímaramminn um framhaldið. Í samkomulaginu frá 2015 er ákvæði um færslu línanna frá byggð kæmi þessi staða upp, sá möguleiki hefur nú þegar verið ræddur við Landsnet. Einnig hefur verið rætt um að leggja hluta línanna í jörð sambærilegt og Hnoðraholtslína 1 sem liggur frá Hamranesi, útfærslan þarfnast m.a. samþykki Orkustofnunnar. Hafnarfjarðarbær mun halda áfram að þrýsta á Landsnet um efndir á samkomulagi um niðurrif Hamraneslína og færslu Ísallína.


Leave a comment

Trjágróður í byggð

Trágróður yfir gangstétt

Hver er stefna Hafnarfjarðarbæjar í trjárækt? Aspir og greni eru víða, tré sem voru lítil og sæt þegar þeim var plantað en eru nú víða 8-10 metra há. Auðvitað er það svo að trjágróður í fullum skrúða er okkur öllum til yndisauka, en er það svo alls staðar? Byggingarreglugerð frá árinu 2012 tekur á hvernig trjágróðri er komið fyrir á lóðarmörkum, fjallað er um skuggavarp og að hávöxnum trjátegundum skuli ekki plantað nær lóðarmörkum en 4,0 metrum. Samkvæmt byggingareglugerðinni er lóðarhafa skylt að halda vexti trjáa og runna innan lóðarmarka. Mjög víða vaxa tré og runnar langt út yfir gangstíga og götur, okkur öllum til ama.

Trjáræktarstefna

Nokkur sveitarfélög sett sér stefnu um trjárækt í þéttbýli. Reglurnar eru fyrst og fremst leiðbeinandi fyrir sveitarfélagið, íbúa og fyrirtæki um á hvern hátt trjárækt í þéttbýli skuli háttað og í samræmi við ákvæði byggingarreglugerðar. Hafnarfjörður hefur ekki sett sér slíkar reglur. Ef skoðað er niðursetning trjáa á bæjarlandinu síðustu árin og áratugina sést að aspir, greni, lággróður og aðrar trjátegundir hafa verið settar niður án þess að endanleg útkoma hafi verið ígrunduð. Niðurstaðan er alls ekki góð. Háar aspir og greni skyggja á garða og útsýni, eru skuggavaldandi og lággróður safnar í sig órækt. Má nefna mjög háar aspir á Strandgötu, óræktina við Hvammabraut, Hamarinn er að drukkna í sjálfsprottnu greni og lággróður safnar í sig órækt mjög víða í bænum.

Aðgerðir

Gróður þarfnast umhirðu og því þarf að gróðursetja samkvæmt því. Þó svo að tré sem voru sett niður áður en núgildandi byggingarreglugerð tók gildi ætti Hafnarfjarðarbær að tileinka sér ákvæði byggingarreglugerðar og fella tré sem ekki falla að reglugerðinni, þar má nefna Strandgötu, Hvammabraut, Hamarinn o.fl. staði. Hafnarfjarðarbær þarf í samráði við íbúa að setja sér stefnu í trjárækt þar sem við öll getum verið sátt við trjágróðurinn í bænum sem vissulega í flestum tilfellum prýðir, veitir skjól og er okkur öllum til yndisauka. Að lokum, hugum að nærumhverfi okkar, öll saman getum við gert bæinn okkar enn fegurri.


Leave a comment

Verum áfram samferða

Kjörtímabilinu sem senn líkur hefur verið jákvætt og uppbyggilegt fyrir okkur Hafnfirðinga. Í upphafi kjörtímabilsins var farið í umfangsmikla úttekt á rekstri bæjarins. Í kjölfarið var ráðist í hagræðingaraðgerðir og endurskipulagningu á rekstrinum sem hefur skilað verulegum ábata fyrir okkur öll án þess að skerða þjónustu við bæjarbúa, þvert á móti skiluðu aðgerðir okkar aukinni þjónustu og lægri álögum til Hafnfirðinga og hafnfirska fyrirtækja.

Á réttri braut

Á síðastu tveimur árum hefur Hafnarfjarðarbær framkvæmt fyrir eigið fé og er af nógu að taka þegar kemur að framkvæmdum kemur. Meðal annars var leikskóli byggður á Völlum og glæsilegt íþróttahús tekið í notkun á Ásvöllum. Skuldir hafa verið greiddar niður og er skuldaviðmið bæjarins nú komið í 138% en var 170% í upphafi kjörtímabilsins, við erum því laus undan eftirlitsnefnd með fjármálum sveitarfélaga og því fjárhagslega sjálfstætt sveitarfélag. Sjálfstæðisflokkurinn stefnir áfram á sömu braut, við munum halda áfram að lækka skuldir, framkvæma fyrir eigið fé, lækka álölur og auka þjónustu.

Umboð áfram til góðra verka.

Framundan eru mikilvægar kosningar sem snúast um hvort haldið verði áfram á sömu braut með ábyrgri fjármálastjórn, áframhaldandi uppbyggingu, lægri álögum og aukinni þjónustu, eða hvort horfið verði í gamla vinstra farið með skuldasöfnun og auknum álögögum á íbúa og fyrirtæki. Sjálfstæðisflokkurinn teflir fram samhentum hópi einstaklinga sem hafa áhugan, reynsluna og umfram allt eru samstíga í að vinna vel fyrir Hafnarfjörð og Hafnfirðinga. Á næsta kjörtímabili óska ég þess að Sjálfstæðisflokkurinn verði áfram samferða ykkur í áframhaldandi uppbyggingu og framförum okkur öllum til heilla.